ჩინეთ-საქართველოს შორის აგრარული მიმართულებით თანამშრომლობა ღრმავდება

სოფლის მეურნეობის მინისტრის მოადგილე, იური ნოზაძე და სოფლის მეურნეობის სამეცნიერო-კვლევითი ცენტრის დირექტორი, ლევან უჯმაჯურიძე ჩინეთის სახალხო რესპუბლიკაში სამუშაო ვიზიტით იმყოფებოდნენ.

როგორც  სოფლის მეურნეობის სამინისტროში განაცხადეს, ვიზიტის ფარგლებში, ქართული დელეგაციის წევრებმა, ჩინეთის სახალხო რესპუბლიკის ნინსიას რეგიონის დედაქალაქ ინჩუანში, „ჰელანის მთის აღმოსავლეთ ფერდობის ღვინის მეხუთე საერთაშორისო გამოფენისა“ და „ჩინეთის ახალგაზრდა სომელიეთა” კონკურსის ღონისძიებებში მიიღეს მონაწილეობა.

მათივე ინფორმაციით, გამოფენის გახსნაზე სოფლის მეურნეობის მინისტრის მოადგილემ, იური ნოზაძემ დამსწრე საზოგადოებას მისასალმებელი სიტყვით მიმართა და აგრარული მიმართულებით საქართველო-ჩინეთის ერთობლივ პროექტებზე ისაუბრა.

იური ნოზაძემ გამოსვლაში ჩინეთში ქართული ღვინის ექსპორტის მზარდ ტენდენციას გაუსვა ხაზი.

როგორც სამინისტროში აცხადებენ, სამუშაო ვიზიტის ფარგლებში, ქართული დელეგაციის წევრები რეგიონის მთავრობისა და მევენახეობა-მეღვინეობის საერთაშორისო ფედერაციის წარმომადგენლებს შეხვდნენ, ასევე, მოინახულეს სამრეწველო ვენახების ფართობები, ღვინის შატოები, დაათვალიერეს ფერმერული მეურნეობები, ნინსიას მეტყევეობის ინსტიტუტის ბიოტექნოლოგიის თანამედროვე ლაბორატორიები, გოჯი ბერისა და საქართველოდან ინტროდუცირებული ქართული ვაზის ჯიშების სადემონსტრაციო ნაკვეთები. აღნიშნული ინსტიტუტი და სოფლის მეურნეობის სამეცნიერო-კვლევით ცენტრი ორ წელზე მეტია სამეცნიერო მიმართულებით თანამშრომლობენ.

ვიზიტის ფარგლებში, ჩინეთის სახალხო რესპუბლიკის ნინსიას რეგიონის მევენახეობა-მეღვინეობის საერთაშორისო ფედერაციასა და საქართველოს სოფლის მეურნეობის სამინისტროს სამეცნიერო-კვლევით ცენტრს შორის თანამშრომლობის მემორანდუმი გაფორმდა.

მემორანდუმი ჩინეთში ქართული ვაზის ღვინის მუზეუმისა და ქართული ვაზის ჯიშების სადემონსტრაციო ნაკვეთების მოწყობას, ასევე, ახალგაზრდა სპეციალისტების ტრეინინგებს, საერთაშორისო კონფერენციებს, ტექნოლოგიების გაზიარებასა და სხვა მიზნობრივ აქტივობებს ითვალისწინებს.